Առ քո թևերին, տար ինձ, ժամանակ,
Ես ետ մնալուց շատ եմ վախենում:
Հուշերից որքան հեռու եմ կենում,
Մեկ է, կապում են թևերս նրանք:
Ակնթարթի մեջ դու կուլ ես տալիս
Այնպիսի մի նոր հավիտենություն,
Որ խոսքս հազիվ հասած բերանիս,
Դառնում է արդեն խորին հնություն:
Դուրս հանիր ինձ այս մթին կիրճերից,
Որ քեզ հասկանամ և ինձ ճանաչեմ:
Փրկիր ինձ այս խուլ ախ ու ճիչերից,
Տուր ինձ քո ոգին, որ ես շառաչեմ:
Տուր ինձ քո ոգին, որ ես շառաչեմ,
Որ ես դադարեմ հանդարտ հոսելուց,
Ինձնից խոսելուց քեզնից չամաչեմ,
Ինձնից չամաչեմ քեզնից խոսելուց:
Տուր ինձ քո ոգին, քո միտքը ներհուն,
Առ ինձ հանճարեղ քո տարերքի մեջ,
Որ չմոլորվեմ քո ոլորտներում
Եվ իմ հոգու բարդ տիեզերքի մեջ:
Պարզեցրու, զտիր խոհերն իմ խառնակ,
Առ քո թևերին, տար ինձ, ժամանակ:
վերլուծություն
Կարծում եմ, ինչքան էլ որ ժամանակը իր թևերի վրա հեռու տանի, միևնույն է, հիշողություններից մարդը չի կարող փախչել: Հեղինակը ցանկանում է ճանաչել ժամանակը, ցանկանում է իր սեփական անդունդը հատել ժամանակից խնդրած օգնության միջոցով։ Կարծում է, որ դրա միջոցով հունի մեջ կընկնի ու կկարողանա իր հանդարտությանը հաղթել, դրանից հետո շարժվել ժամանակի հետ։ Միայն այդ փոքր օգնությունն է պետք։ Պետք է, որպեսզի կարողանա համարձակորեն խոստովանել սեփական անձին, որ ժամանակի հետ է շարժվում, չի վատնում ժամանակը և ժամանակի կողմից չի մաշվում ու սպառվում։